Radiotelevisión del Principáu d'Asturies Radiotelevisión del Principado de Asturias

Radiotelevisión del Principado de Asturias

Asturias / Sanidad

Escuchar

Fuente: RTPA, 18 de marzu. 2025 20:32

El centru de Salú de Cuideiru cunta con una nueva unidá de salú bucodental

En castellano

El centro de Salud de Cudillero cuenta con una nueva unidad de salud bucodental

Este navegador no soporta vídeos.

La conseyera de Salú visita les instalaciones

Les nueves consultes d'hixenista y odontoloxía de Cuideiru completen la rede d'atención a la salú bucodental del área sanitaria III, que correspuende cola fastera d'Avilés, na que l'Hospital San Agustín inxerta un equipu que dexa algamar imáxenes d'alta definición de la cavidá bucal.

La conseyera de Salú, Concepción Saavedra, visitó güei l'equipamientu, yá en serviciu. Les nueves consultes funcionen tolos martes del mes y ún de cada dos xueves, lo qu'evita que la población del conceyu tenga que dir a Pravia pa recibir atención, informa'l Principáu nuna nota.

La conseyera de Salú, Concepción Saavedra, visitó esti martes les instalaciones.

La cita pídese directamente nel centru de salú y nun se necesita asistencia previa del personal de medicina de familia.

Dempués de l'apertura d'esta unidá, l'área sanitaria III cunta con seis equipos formaos por odontólogu y hixenista que dan serviciu nes unidaes de salú bucodental de Villalegre/La Xungarosa (Avilés), Corvera/Lluanco, Pravia/Cuideiru, Castrillón, El Quirinal/La Madalena (Avilés) y Avilés Centru/Sabugo.

L'área sanitaria III tien agora 15 consultes, seis más qu'en 2023, cuando'l Principáu entamó a ampliar y modernizar les infraestructures y la cartera de servicios de salú bucodental.

El Principáu desendolca dende 2023 un programa p'ampliar y modernizar les infraestructures y la cartera de servicios de salú bucodental.

Ún de los oxetivos del plan ye ufiertar en 2026 una atención total qu'abarque dende la prevención hasta los tratamientos especializaos a tola población infantil y adolescente de 0 a 18 años.

Hasta l'añu pasáu, el programa inxertaba a menores de seis a 14 años, asina como a pacientes oncolóxicos con cáncer de cabeza y pescuezu, embaranzaes, población xeneral con patoloxía oral y persones con discapacidá reconocida superior al 33%.

En 2024, la cobertura amplióse a neños y neñes d'hasta 16 años, y esti añu, el programa siguirá espardiéndose y en 2026 tará inxerta tola población de 0 a 18 años.

Amás, les persones con discapacidá intelectual superior al 33%, aquelles con discapacidá en miembros superiores que-yos torgue facer l'autocuidáu oral y les que sufren alteraciones conductuales severes y oxetivables tamién tienen accesu a estos servicios.